Schieson Trevisann alla cena di Natale

Semo rivai fora ancora vivi e vegeti
rintronai dal'alcol come ebeti
na serata al limite dea decensa
col Dondi ch'el gà mangà anca a credensa
el gà messo in boca de chei boconi assurdi
che no gà corajo de magniar gnianca i curdi
ghe jera a pissa soto a salsa rosa de sora
meansane picanti e tuto el gà fato fora
intanto ch'el magnava o gavemo anca filmà
e parchè no se ghe credea anca fotografà.
Pal resto ghe jera a cameriera massa soridente
forse forse ghe gavemo visto un meso dente
pal resto muso longo e testa bassa
andando daea cusina fin daea cassa.
Fiumi de patatine pisse e panini
tra un bocon e che altro ridar come cretini
parlando de gionni e toni ai tempi del super
semo montai ancora ridendo dentro a minicuper
e dopo tuti dal Dondi par farse un bicierin de amaro
gavemo visto beisime foto de un ricordo raro
i do miliardari el giorno del matrimonio
i gà fato feste buee, quasi un pandemonio.
A Ile e Calogero nominai a coppia dell'anno
parchè fin 'desso tra jori dò no i ga fato danno.
El CP responsabie aea mesanote zè 'ndato casa
parchè a Nico lo gà minaccià de farghe a testa rasa.
Area, Nico: gran bea minacia!
El toso no'l zè fulvo in testa come na acacia
quindi aea prosima volta daghe soeo pache
co bote in testa o tirandoghe e tirache.
Mi e signora godendo dea compagnia
dopo 20 minuti semo 'ndati via
sodisfati de na serata passada tra amici
contandosea sempre tuti felici
ghe jera certo qualche assensa
ma aea fine gavemo dito "pasiensa"
se trovaremo n'altra volta de certo
ridendo come el soito in concerto.
Aprofito par farve a tuti tanti auguri
e che el novo ano el ne porte tempi poco duri
i sarà difisii certo ma restemo in gamba
superemo i problemi e baemose na bea samba
na rumba, un tango magari anca col casquè
a tuti bone feste e el soito AH HE JI ME